پاکستان پہلی بار چینی مارکیٹ میں “پانڈا بانڈ” جاری کرے گا، وزیر خزانہ کا بڑا اعلان

اسلام آباد: وزیر خزانہ محمد اورنگزیب نے اعلان کیا ہے کہ پاکستان اگلے ہفتے پہلی بار چینی سرمایہ مارکیٹ میں “پانڈا بانڈ” جاری کرے گا، جس کا مقصد ملکی معیشت کو مضبوط بنانا اور بڑھتے ہوئے درآمدی دباؤ سے نمٹنا ہے۔

وزیر خزانہ نے پریس کانفرنس کے دوران کہا کہ پاکستان چین کی مالیاتی مارکیٹ سے سرمایہ حاصل کرنے کی تیاری مکمل کر چکا ہے اور یہ اقدام ملکی معیشت کے لیے اہم سنگِ میل ثابت ہوگا۔

انہوں نے کہا کہ ایران تنازع اور آبنائے ہرمز میں کشیدگی کے باعث تیل اور ایل این جی درآمدات پر دباؤ بڑھا، تاہم حکومت نے معاشی استحکام برقرار رکھنے کے لیے مؤثر اقدامات کیے ہیں۔

زرمبادلہ ذخائر میں اضافہ متوقع

محمد اورنگزیب کے مطابق جون کے آخر تک پاکستان کے زرمبادلہ ذخائر تین ماہ کی درآمدات کے برابر ہونے کی توقع ہے۔ انہوں نے بتایا کہ تمام بیرونی دباؤ کے باوجود رواں مالی سال میں معیشت تقریباً 4 فیصد تک ترقی کر سکتی ہے، جبکہ گزشتہ سال یہ شرح 3.1 فیصد تھی۔

• برآمدات میں 14 فیصد اضافہ ہوا
• مارچ میں ترسیلات زر 3.8 ارب ڈالر رہیں
• اپریل میں ترسیلات زر 3.5 ارب ڈالر تک پہنچ گئیں
• روشن ڈیجیٹل اکاؤنٹس میں سرمایہ کاری میں بھی اضافہ ریکارڈ کیا گیا

آئی ایم ایف سے 1.32 ارب ڈالر کی منظوری

یہ پیش رفت ایسے وقت میں سامنے آئی ہے جب آئی ایم ایف نے پاکستان کے لیے تقریباً 1.32 ارب ڈالر کی مالی معاونت کی منظوری دی ہے، جسے حکومت معاشی بحالی کے لیے اہم قرار دے رہی ہے۔

سستی ایل این جی کی خوشخبری جلد متوقع

وفاقی وزیر پیٹرولیم علی پرویز ملک نے کہا کہ حکومت آئندہ بجٹ میں عوام کو زیادہ سے زیادہ ریلیف دینے کی کوشش کرے گی۔

انہوں نے کہا کہ خطے میں کشیدگی کے باوجود پاکستان میں ایندھن کی فراہمی متاثر نہیں ہوئی، جبکہ سعودی عرب، قطر، متحدہ عرب امارات اور ایران نے بھی توانائی سپلائی برقرار رکھنے میں تعاون کیا۔

وزیر پیٹرولیم کے مطابق حکومت دوست ممالک سے سستی ایل این جی حاصل کرنے کے لیے کام کر رہی ہے تاکہ گرمیوں میں بجلی بحران سے بچا جا سکے۔

“قوم کو جلد خوشخبری ملے گی کہ پاکستان کو مہنگی RLNG خریدنے کی ضرورت نہیں پڑی۔”